قصيد ( ضيقة الخاطر والحيا المرماده )

ضيقة الخاطر والحيا المرماده ** تشيب صغير السن قبل انداده

والحيا المندمه *** تشغشب على ابنادم تنزح دمه

القل يغبي زول كان مسمى *** والمال يشهر ناس ماهم ساده

بلا مال ما تقدر شروط الهمه *** وتجواد ما تظهر عليك جوداه

والحيا المدمومه *** تشغشب على ابنادم أطير نومه

بلا مال بو جلجل يولى بومه *** وبالمال بو حوام فات العادة

ناش الحبارى قبل طير الحومه *والصقر حاير فى المعاش اوكاده

والحيا المعفونه *** تشغشب على ابنادم وتقلب لونه

كثير الدراهم والعمش فى عيونه **يشحوه لا كّانه غزال حماده

وانا مريض وضحكتى مشنونه ** مريض قلب ما نيشى مريض وساده

والحيا المعطوبه ** تشغشب على ابنادم وتقطع صوبه

بلا مال تبدا حالته منكوبه ** وبالمال يبدا عزم فات انداده

بلا مال تبدا عيطه منبوبه ** وفيه السوايا كايده العداده

والحيا المرعوشه ** تخلى صغير السن راسه لوشه

والفقر لو ردن عليك جيوشه ** كريم ربنا يرزق معاش عباد

ان كان الغنىّ من العبد يغلق حوشه **اما باب ربى ما عليه مكاده

والحيا المغتصه ** تشغشب على ابنادم وتبرم نصه

اللى قوى ياخد خيار الحصه ** الا الضعيف من فقره عليه صماده

واللى معاه العرف ما يتوصى ** يدير كل شىء بالقدر ع المعتاده

والصغا والهده ** تشيب صغير السن قبل المده

واللى عطاه الله ظافر قده ** تعلى على الكرسى زها بقعاده

واللى عقب والفقر قاطع رده * يفوت الصوايب غصب ما هى راده

والصغا والغصره ** وتسمع كلام العيب فيه الجسره

بلا مال ما عندك حبيب ونصره ** يفرج عليك الكرب بعد كساده

ولا ياخدك طول النهار وقصره ** يضوى ظلام الليل بعد سواده

والصغا لبنادم ** يخليه لونه شين رايه عادم

لا يصيد يكسب لا جمل لا خادم ** ويبدا حديثه شين بين انداده

وكثير الدراهم كان جاهم زادم ** يقولوا حديثه زين فعله قادة

بالمال حتى الخايب ** يجوا معاه جملتهم شباب وشايب

واما قليل المال قالوا سايب ** يمشى يكر الفحم للحداده

والمولى على جملة عبيده نايب ** الحكم حكمه والمراد مراده

ضيقة الخاطر ملت ** عليّ حابسه منها القلوب اعتلت

تناتيلها وقت الحجايج فلت ** على رى ساعه يسهروا الجباده

والعين ما جاها طرب وانحلت ** وهى مغير تسكب دمعها بداده

حالها شينى ** ولانيش عنها من قديم مونى

اللى ظانه خفف اثقاله عنى ** استشوى تراب الهم زاد رشاده

ويا ريت بوى من زمان دفنى ** افتكيت رانى م الصغا وعناده

حالها متبيّن ** تخليك ديمه بين خوتك هين

فى الجمع لو يبقى حديثك لين ** تقول طيبه ترجع عليك مكاده

وليا لهموك الدين ما تدين ** واسبق على ربك وسيع ابداده

واسبق على ربك بحسب وطاعه ** رزقك على ربك بغير نزاعه

بالك اتبع يا فهيم دناعه ** لو كان ما تكسب ولا وداده

خليه صوتك يرتفع بشفاعه ** واتبع عباد الصلح والزهاده

اتبع عباد الصلح راك تسلم ** وتفكر رقاد القبر وقت يظّلم

واسكت على مولاك لا تتكلم ** ورب القضا يصعب عليك عناده

وواجب عليك الفرض فيه تسلم ** واصبر على العازات غصب وراده


قصيد ( ضيقة الخاطر والحيا المرماده ) الشاعر امحمد قنانة الزيدانى . المشهور بسيدي قنانة