.يم العيون رغـيـبــة

يا ام العيون رغيبه ...............اتقول بينا شلواش دار كتيبة ..غلاي ناسية

يا ام الهدوب عشاش ...............للياس الغلا بعتيه بيع بلاش
اتقول غير كاتب بيننا شلواش ....كلتنا علي لاخر اكثر تكريبه
ولا اتقول في مرة نظرنا طاش .....شورك ولاانتي صوبنا اشقيتيبه
ولا اتقول لميتي لها قشواش .......نار الغلا لا اتقول شاكيتيبه
ولا اتقول قلتيلي غلاك احواش ....عندي وما نطرب امفيت انجيبه
واليوم الغلا عدى علي سطاش ....وانتي هي السبب يابنت في تخريبه

يام الغثيث امعـرّم .......................يميح عاليمين وع اليسار اصـرّم
اخطورك علي غفلات نومي حـرّم ...انوض بالغطا تقشيع وانشاليبه
وحتى وانت ياغالي اليوم امبرم.......وديوان غيري ساحبك شاقيبه
مازلت عن غيرك اتقول امصرّم ......سريب مو سريب غلاك ما ندويبه

يا ام العيون اتعوق.......................ويم الشفاه امعورجة بدقوق
ويم الجبين اتقول ظي ابروق..........ويم الغثيث اطوال ماح صليبه
للياس الغلا بعتيه بيع اطلوق..........بحكم الشريعة راك تجّازيبه
عليك خاطري مازال ناصب سوق...حتى بطول ياساتك وموح وغيبة
ومازال شورك فالرحيل ايسوق......ومازال لا توا غلاك طليبه
كبير فاهقك بخلال مو مطقوق ......وجرحك تـهـلّـع كادني تطبيبه
ولو انطالبك عندي عليك احقوق ...سوا بشرع ياريدي سوا بدريبة

....يم العيون رغـيـبــة